निनावी तक्रारी तसेच खोट्या तक्रारी पडताळणी करिता महाराष्ट्र शासनाने खालील प्रमाणे सूचना दिनांक 25/02/2015 रोजीच्या शासन निर्णय अन्वये निर्गमित केल्या आहेत.

• ज्या तक्रारीमध्ये तक्रारदाराचे नाव व पत्ता नमुद केलेला नाही अशा निनावी अर्जदारांच्या तक्रारी मध्ये कोणत्याही स्वरूपाची तक्रार / माहिती अंतर्भूत असली तरी त्यावर कोणत्याही स्वरूपाची कार्यवाही करण्यात येऊ नये. अशा प्रकारच्या तक्रारी परस्पर दफ्तरी दाखल करण्यात याव्यात.
• ज्या तक्रारीमध्ये (vague) असंबध्द असे आरोप केलेले आहेत अशा तक्रारी मध्ये देखील तक्रारदाराची तपासणी न करता अश्या तक्रारी परस्पर दफ्तरी दाखल करण्यात याव्यात.
• ज्या तक्रारीमध्ये पडताळणी करता येवू शकेल असे आरोप केलेले आहेत, अशा तक्रारीचे संबंधात संबंधित प्रशासकीय विभाग/मंत्रालयाने त्याची दखल घ्यावी व पुढील कार्यवाही करावी. अशा प्रकरणी सक्षम प्राधिका-याच्या मान्यतेने सदरहू तक्रार तक्रारदाराकडे पाठवून ती त्यांने स्वतःच केली आहे किवा कसे? याबाबत खात्री करून घेण्यात यावी. तक्रारदाराकडून 15 दिवसामध्ये प्रतिसाद मिळाला नाही तर स्मरणपत्र पाठविण्यात यावे व तद्नंतर 15 दिवसांची प्रतिक्षा केल्यानंतर देखील माहिती प्राप्त न झाल्यास सदरहू तक्रार खोटया नावाची (Pseudonymous) तक्रार असल्याचे नमुद करून दफ्तरी दाखल करण्यात यावी.
• तक्रारदाराने आपण स्वत: तक्रार केल्याचे मान्य केल्यास अशा तक्रारीवर कार्यवाही करताना अश्या प्रकारच्या तक्रार अर्जातील अर्जदाराचे नाव व पत्ता झाकुन तक्रारीची छायांकित प्रत काढुन ती चौकशीसाठी संबंधित यंत्रणेकडे पाठवावी व पुढील कार्यवाही करावी.